NBK109: వచ్చేసింది.. ఆ సమయం వచ్చేసింది.. ఫ్యాన్స్ రెడీ అవ్వండి
ABN , Publish Date - Nov 12 , 2024 | 06:56 PM
గాడ్ ఆఫ్ మాసెస్ నందమూరి బాలకృష్ణ నటిస్తోన్న NBK109 సినిమాపై ఏ రేంజ్‌లో అంచనాలు ఉన్నాయో తెలియంది కాదు. ఈ మూవీ టైటిల్, టీజర్ దీపావళికి విడుదల కావాల్సి ఉండగా.. మేకర్స్ సడెన్‌గా వాయిదా వేశారు. తాజాగా NBK109 టైటిల్, టీజర్ రిలీజ్‌కు సంబంధించిన అప్డేట్‌ని మేకర్స్ వదిలారు.
గాడ్ ఆఫ్ మాసెస్ నందమూరి బాలకృష్ణ కొన్నేళ్లుగా అపజయమెరుగకుండా వరుస భారీ విజయాలతో దూసుకుపోతున్నారు. ప్రస్తుతం తన 109వ చిత్రం NBK109 కోసం బ్లాక్ బస్టర్ దర్శకుడు బాబీ కొల్లితో చేతులు కలిపారు. ఈ సినిమాపై ఎటువంటి అంచనాలు ఉన్నాయో ప్రత్యేకంగా చెప్పాల్సిన అవసరమే లేదు. నందమూరి అభిమానులతో పాటు, తెలుగు సినీ ప్రియులంతా ఎంతగానో ఎదుచూస్తున్న చిత్రమిది. ఇప్పటికే విడుదలైన పోస్టర్స్, గ్లింప్స్ విశేషంగా ఆకట్టుకోగా.. తాజాగా మేకర్స్ మాసివ్ అప్డేట్‌ని వదిలారు. దీపావళికి ఇస్తామన్న ఈ అప్డేట్‌ని ఎప్పుడు ఇవ్వబోతోంది తెలుపుతూ.. మేకర్స్ ఓ పవర్ ఫుల్ పోస్టర్‌ని వదిలారు.
Also Read- Kishan Reddy: తనకు ప్రాణహాని ఉందని తెలిసి కూడా..
ఈ పోస్టర్ సినిమాపై భారీగా అంచనాలను పెంచేస్తోంది. ఎందుకంటే, ఈ పోస్టర్‌లో బాలయ్య విభిన్న దుస్తులు ధరించి, ప్రత్యేకంగా రూపొందించిన ఆయుధాలను చేతబట్టిన విధానం ఎంతో శక్తివంతంగా ఉంది. నెత్తురంటిన గొడ్డలిని పట్టుకొని, పొడవాటి జుట్టు, గుబురు గడ్డంతో బాలయ్య నిలబడి ఉన్న రూపం చూస్తుంటే.. మరో సక్సెస్ బాలయ్య ఖాతాలో పడినట్టే అని ఫిక్సయిపోవచ్చు. ఈ ఒక్క పోస్టర్ సినిమాపై అంచనాలను ఎన్నో రెట్లు పెంచేలా ఉంది. ఇక ఫ్యాన్స్ ఎప్పుడెప్పుడా అని ఎదురు చూస్తున్న టైటిల్, టీజర్ అప్డేట్‌ని ఈ పోస్టర్ ద్వారా రివీల్ చేశారు మేకర్స్.
కార్తీక పూర్ణిమ శుభ సందర్భంగా, నవంబర్ 15న ఉదయం 10 గంటల 24 నిమిషాలకు NBK109 టైటిల్ టీజర్‌ను విడుదల చేయనున్నట్లు నిర్మాతలు అధికారికంగా ఈ పోస్టర్ ద్వారా ప్రకటించారు. ఈ పోస్టర్ ప్రస్తుతం వైరల్ అవుతోంది. బాలీవుడ్ నటుడు బాబీ డియోల్ ఈ చిత్రంలో కీలక పాత్ర పోషిస్తున్నారు. ప్రముఖ ఛాయాగ్రాహకుడు విజయ్ కార్తీక్ కన్నన్ కెమెరా బాధ్యతలు నిర్వహిస్తున్న ఈ చిత్రానికి సంచలన స్వరకర్త ఎస్.థమన్ సంగీతం అందిస్తున్నారు. కళా దర్శకుడిగా అవినాష్ కొల్లా, ఎడిటర్‌గా నిరంజన్ దేవరమానే వ్యవహరిస్తుండగా.. సితార ఎంటర్‌టైన్‌మెంట్స్‌, ఫార్చ్యూన్‌ఫోర్ సినిమాస్‌ పతాకాలపై సూర్యదేవర నాగవంశీ, సాయి సౌజన్య ఈ చిత్రాన్ని నిర్మిస్తున్నారు. శ్రీకర స్టూడియోస్ సమర్పిస్తోంది. చిత్రీకరణ చివరి దశలో ఉన్న ఈ చిత్రం, 2025 సంక్రాంతి కానుకగా ప్రపంచవ్యాప్తంగా భారీస్థాయిలో విడుదల కానుంది.