Siddhu Jonnalagadda: కుమ్ముతున్న టిల్లుగాడు, సంచలన కలెక్షన్స్

సిద్దు జొన్నలగడ్డ, అనుపమ పరమేశ్వరన్ జంటగా నడిచిన 'టిల్లు స్క్వేర్' సినిమా గత శుక్రవారం విడుదలైంది. మల్లిక్ రామ్ దర్శకుడు, సూర్యదేవర నాగవంశీ, సాయి సౌజన్య నిర్మాతలు. ఈ సినిమా విడుదలైన మొదటి ఆట దగ్గరనుండి పాజిటివ్ టాక్ రావటం, ఉదయం ఆటలు అన్నీ హౌస్ ఫుల్స్ అవటం ఆ తరువాత హిట్ టాకుతో బాక్స్ ఆఫీస్ దగ్గర ఈ సినిమా కలెక్షన్స్ వర్షం కురిపించటం జరుగుతోంది. మొదటిరోజు కన్నా, రెండో రోజు ఎక్కువ కలెక్షన్స్ సాధిస్తే, మూడోరోజు ఇంకా ఎక్కువగా కలెక్షన్స్ సాధించి సంచలనం సృష్టిస్తోంది.

అమెరికాలో అయితే ఈ సినిమా ఇప్పటికే 1.85 మిలియన్ డాలర్స్ కలెక్టు చేసిందని అంటున్నారు. అంటే సుమారు రూ. 15 కోట్లు వరకు అక్కడ కలెక్టు చేసి సంచలనం దిశగా దూసుకుపోతోంది. సిద్దు జొన్నలగడ్డ ఇంతకు ముందు చేసిన 'డీజీ టిల్లు' కన్నా ఆ సినిమా సీక్వెల్ అయినా ఈ 'టిల్లు స్క్వేర్' చాలా బాగుంది అనటం, బాక్స్ ఆఫీస్ దగ్గర ఇలాంటి ఒక చిన్న సినిమా పెద్దగా కలెక్షన్స్ కురిపించటం పరిశ్రమలో అందరూ ఆశ్చర్యపోతున్నారు.

ఇప్పుడు మూడో రోజుకే ఈ సినిమా బ్రేక్ ఈవెన్ కూడా అయిపోయిందని, ఇక లాభాల బాటలో పడిందని ట్రేడ్ అనలిస్ట్స్ చెపుతున్నారు. ఈమధ్య కాలంలో ఒక చిన్న సినిమా మూడు రోజుల్లో ఇంతటి కలెక్షన్స్ ఎన్నడూ సాధించలేదని కూడా అంటున్నారు. మూడు రోజులకి గాను ఈ సినిమా సుమారు రూ. 55 కోట్ల గ్రాస్ ఉంటుందని ఈ సినిమాకి ఇది అత్యంత భారీ కలెక్షన్స్ అని పరిశ్రమలో అశ్చర్యపోతున్నారు. అలాగే ఈ సినిమా నెట్ అంటే టాక్సులు అవీ పోను మూడు రోజులకు గాను సుమారు రూ. 33 కోట్లు కలెక్టు చేసిందని కూడా చెపుతున్నారు.

రానున్న రోజుల్లో ఈ సినిమా ఇంకా ఎక్కువ కలెక్టు చేస్తుందని కూడా అంటున్నారు. ఈ సినిమాకి లాంగ్ రన్ ఉందని, ఎందుకంటే ప్రేక్షకులు ఒకటికి రెండు సార్లు చూస్తున్నారని, సిద్దు జొన్నలగడ్డ టిల్లు పాత్రలో అందరినీ నవ్విస్తూ ఆ పాత్రలో మమేకం అయిపోయాడని అంటున్నారు. ప్రేక్షకులు థియేటర్స్ లో మొదటి నుండి చివరి వరకు నవ్వుతూనే వున్నారని, ఈ సినిమా నూటికి నూరుశాతం వినోదం పండిస్తోంది అని అంటున్నారు.