Yamudu: ‘అపరిచితుడు’ కాన్సెప్ట్‌తో ‘యముడు’.. ఫస్ట్ లుక్ చూశారా
ABN , Publish Date - Nov 14 , 2024 | 10:16 PM
2005లో శంకర్ దర్శకత్వంలో హీరో విక్రమ్ నటించిన ‘అపరిచితుడు’ చిత్ర కాన్సెప్ట్‌తో.. అంతకంటే డిఫరెంట్‌గా ఓ చిత్రం తెరకెక్కుతోంది. ఆ చిత్ర ఫస్ట్ లుక్‌ని నిర్మాత రాజ్ కందుకూరి విడుదల చేశారు. ఆ మూవీ విశేషాలివే..
జగన్నాధ పిక్చర్స్ పతాకంపై జగదీష్ ఆమంచి హీరోగా నటిస్తూ స్వీయ దర్శకత్వం వహించిన చిత్రం ‘యముడు’. ‘ధర్మో రక్షతి రక్షిత’ అనే ఉపశీర్షికతో వస్తున్న థ్రిల్లర్ చిత్రమిది. ప్రస్తుతం ఈ సినిమా షూటింగ్ అంతా పూర్తి చేసుకుని పోస్ట్ ప్రొడక్షన్ పనులను శరవేగంగా జరుపుకుంటోంది. అన్ని కార్యక్రమాలు పూర్తి చేసి.. డిసెంబర్ నెలలో ఈ చిత్రాన్ని విడుదల చేయటానికి మేకర్స్ సన్నాహాలు చేస్తున్నారు. ఈ చిత్రంలో జగదీష్ ఆమంచి సరసన శ్రావణి శెట్టి హీరోయిన్‌గా నటించగా.. ఆకాష్ చల్లా రెండో హీరోగా నటించారు. తాజాగా ఈ మూవీ ఫస్ట్ లుక్ పోస్టర్‌ని టాలీవుడ్ నిర్మాత రాజ్ కందుకూరి విడుదల చేశారు. (Yamudu First Look Launched)
Also Read-మిల్కీ బ్యూటీ తమన్నాలో ఈ మార్పు చూశారా..
ఫస్ట్ లుక్ విడుదల అనంతరం నిర్మాత రాజ్ కందుకూరి మాట్లాడుతూ.. ‘యముడు’ చిత్ర ఫస్ట్ లుక్ విడుదల చేయడం చాలా సంతోషంగా ఉంది. ఇప్పుడే కథ విన్నాను, చాలా ఇంట్రెస్టింగ్‌గా ఉంది. మంచి కథ, ప్రేక్షకులకి ఖచ్చితంగా నచ్చుతుంది. ఈ రోజుల్లో ప్రేక్షకులు చిన్న సినిమా, కొత్త సినిమా అని చూడటం లేదు. సినిమాలో కంటెంట్ బాగుంటే సూపర్ హిట్ చేస్తున్నారు. ఈ చిత్రాన్ని జగదీష్ ఆమంచి బాగా చేసుంటారు అని నమ్ముతున్నాను. ఈ సినిమా మంచి హిట్ కావాలని కోరుకుంటున్నానని అన్నారు.
హీరో, దర్శకుడు నిర్మాత జగదీష్ ఆమంచి మాట్లాడుతూ.. మా ‘యముడు’ చిత్రం ఫస్ట్ లుక్‌ని విడుదల చేసిన నిర్మాత రాజ్ కందుకూరికి ధన్యవాదాలు. మా చిత్ర కథ విషయానికి వస్తే సామాన్య ధర్మం పాటించకుండా సమాజానికి కీడు చేసే వాళ్ళకి యముడు ప్రత్యక్షమై గరుడ పురాణం ప్రకారం శిక్షలు వేస్తుంటాడు. యముడు ఎందుకు అలా చేస్తాడు? చివరికి ఏమవుతుంది అనేదే చిత్ర కథ. 2005లో శంకర్ దర్శకత్వంలో హీరో విక్రమ్ నటించిన ‘అపరిచితుడు’ చిత్ర కాన్సెప్ట్‌తోనే కాస్త డిఫరెంట్‌గా మా సినిమా ఉంటుంది. తెలుగు ప్రేక్షకులందరికీ మా యముడు చిత్రం నచ్చుతుందని తెలిపారు.