YVS Chowdary: ఈ యంగ్ చాప్ ఎన్టీఆర్‌లో అవే నన్ను ఆకట్టుకున్నాయి
ABN , Publish Date - Oct 30 , 2024 | 08:38 PM
తెలుగు చిత్రసీమలో విశిష్టమైన నందమూరి వారసత్వాన్ని మరింత ముందుకు తీసుకువెళుతూ, లెజెండరీ నటుడు ఎన్టీఆర్ ముని మనవడు, హరికృష్ణ మనవడు, దివంగత జానకిరామ్ తనయుడు యంగ్ చాప్ నందమూరి తారక రామారావు ఫిలిం ఇండస్ట్రీలోకి హీరోగా అడుగుపెడుతున్నారు. ఈ ఎన్టీఆర్‌ని ఇండస్ట్రీకి పరిచయం చేస్తున్న దర్శకుడు వైవీఎస్ చౌదరి ఏమన్నారంటే..
తెలుగు చిత్రసీమలో విశిష్టమైన నందమూరి వారసత్వాన్ని మరింత ముందుకు తీసుకువెళుతూ, లెజెండరీ నటుడు ఎన్టీఆర్ ముని మనవడు, హరికృష్ణ మనవడు, దివంగత జానకిరామ్ తనయుడు యంగ్ చాప్ నందమూరి తారక రామారావు ఫిలిం ఇండస్ట్రీలోకి హీరోగా అడుగుపెడుతున్నారు. డైనమిక్ డైరెక్టర్ వైవిఎస్ చౌదరి రచన, దర్శకత్వం వహిస్తున్న ఈ ఎక్సయిటింగ్ ప్రాజెక్ట్‌ని న్యూ టాలెంట్ రోర్స్ @ అనే బ్యానర్‌పై యలమంచిలి గీత నిర్మించనున్నారు. బుధవారం డైరెక్టర్ వైవిఎస్ చౌదరి అందరినీ సర్‌ప్రైజ్ చేస్తూ న్యూ నందమూరి తారక రామారావు గ్రేస్‌ఫుల్ ఫస్ట్ లుక్ గ్లింప్స్‌ని లాంచ్ చేశారు. ఈ వీడియో వైవిఎస్ చౌదరి క్రియేటివ్ విజన్, యంగ్ హీరోకి తనపై ఉన్న కాన్ఫిడెన్స్‌ని ప్రజెంట్ చేస్తోంది.
Also Read- Jai Hanuman: ‘జై హనుమాన్’లో హనుమంతుడిగా ఎవరంటే.. లుక్ వచ్చేసింది
ఈ వీడియోలో న్యూ ఎన్టీఆర్ తన పొడవాటి జుట్టు, దృఢమైన శరీరాకృతితో అందంగా, ఆకర్షణీయంగా కనిపించారు. అర్థవంతమైన పాత్రలను ఎంచుకుని ప్రేక్షకులను అలరిస్తానని, పరిశ్రమకు విధేయుడిగా ఉంటానని తన తాత ఎన్టీఆర్‌పై ప్రమాణం చేస్తూ ఆయన ప్రతిజ్ఞ చేశారు. వైవీఎస్ చౌదరి ఆధ్వర్యంలో 18 నెలల పాటు వివిధ విభాగాల్లో శిక్షణ పొందానని, తన అంకితభావాన్ని వెల్లడించారు. ఈ యువ హీరో స్టార్‌గా ఎదగడానికి కావలసిన అన్ని లక్షణాలను ప్రదర్శిస్తూ తన బేస్ వాయిస్, పవర్ ఫుల్ డైలాగ్ డెలివరీతో ఆకట్టుకున్నారు. YVS చౌదరి అతనిని డైనమిక్ పాత్రలో చూపించడానికి సిద్ధంగా ఉన్నారు.
ఇక ఫస్ట్ దర్శన్ ప్రెస్‌మీట్‌లో డైరెక్టర్ వైవిఎస్ చౌదరి మాట్లాడుతూ.. నేను రాసుకున్న కథని మోయగలిగి, ప్రజల్లోకి తీసుకెళ్లగలిగే దమ్మున్న క్యారెక్టర్‌ని పోషించగల సత్తా ఉన్న ప్రధాన సూత్రధారి అయిన కథానాయకుడిని ఈ వేడుక ద్వారా మీ అందరికీ పరిచయం చేయడం చాలా ఆనందంగా ఉంది. ఇది నేను ఎంతో కాలంగా ఎదురుచూస్తున్న సమయం. విశ్వ విఖ్యాత నట సార్వభౌమ నందమూరి తారక రామారావుగారిపై వున్న అభిమానం, ఇష్టంతో పరిశ్రమలోకి వచ్చాను. ఆయన ప్రోత్సాహం వల్లే ఇప్పుడు ఈ స్థానంలో వున్నాను. ఎన్టీఆర్ అనే పేరు నాకు మూడు అక్షరాల తారకమంత్రం. ఆరడుగుల రూపం ఈ తారక రామారావుది. ఈ హీరోకు కుటుంబం నుంచి పూర్తి ఆశీస్సులు వుంటాయి. నేను అందరి హీరోల అభిమానులను ఆప్యాయంగా పలకరిస్తాను. నేను ఇప్పటివరకు పరిచయం చేసిన హీరోలందరినీ ఫ్యాన్స్‌ ఆదరించారు. అలానే ఈ తారకరామారావును కూడా ఆదరిస్తారని ఆశిస్తున్నాను.
మొదటిసారి ఈ ఎన్టీఆర్‌ని చూడగానే అతడి కళ్లు, కనుబొమ్మలు నన్ను ఆకట్టుకున్నాయి. ఎంతో అణుకువగా ఉంటారు. అతడి వాయిస్ కూడా చాలా గంభీరంగా ఉంటుంది. నందమూరి కుటుంబంలో నుంచి అద్భుతమైన హీరో అవుతాడని నాకు నమ్మకం ఉంది. ఎన్టీఆర్‌గారి జీవితంలో కొత్త అధ్యాయానికి తెరలేపిన చిత్రం ‘సర్దార్ పాపారాయుడు’. ఆ చిత్రం అక్టోబర్ 30న రిలీజ్ అయింది. ఇదే రోజున మా ఈ వేడుక జరుపుకోవడం చాలా ఆనందంగా ఉంది. ఆ చిత్రం రిలీజ్ అయిన రోజునే ఇంకో నందమూరి తారక రామారావుని పరిచయం చేయడం ఒక అదృష్టంగా భావిస్తున్నాను. ఎన్టీఆర్‌గారి రాఘవేంద్రరావు, అశ్విని దత్ గార్ల ప్రయాణం అద్భుతం. అలాంటి గొప్పవ్యక్తులు ఇద్దరూ ఈ రోజున మా యువ హీరోని పరిచయం చేయడం అదృష్టంగా భావిస్తున్నాను. ఈ సభా పూర్వకంగా వారికి ధన్యవాదాలు తెలియజేస్తున్నాను. అందరూ మా కథానాయకుడికి ఆశీస్సులు అందించాలని కోరుకుంటున్నానని అన్నారు. కాగా, చిత్రంలో ప్రతిభావంతులైన కూచిపూడి నృత్యకారిణి, తెలుగు నటి వీణా రావు కథానాయికగా నటిస్తున్నారు. ఆస్కార్ విజేత MM కీరవాణి మ్యూజిక్ అందిస్తున్నారు.