బాలీవుడ్ తారల ముందు తెలంగాణ వనితకు అవార్డ్

భారతదేశంలో యూఎంబీ అందాల పోటీకి ఉండే క్రేజ్ ఏంటో తెలియంది కాదు. ఈ సారి దేశం నలుమూలల నుంచి దాదాపు 70 మంది పోటీదారులను ఈ పోటీకి స్వాగతించారు. నాలుగు సంవత్సరాల క్రితం ఉర్మి, స్నిగ్ధా బారుహ్ స్థాపించిన UMB అందాల పోటీ.. ప్రస్తుతం దేశ వ్యాప్తంగా క్రేజ్‌ను దక్కించుకుంది. బాలీవుడ్ స్టార్స్ నేహా ధూపియా, కరిష్మా కపూర్, మలైకా అరోరా, సారా అలీ ఖాన్, అర్జున్ కపూర్, మానుషి చిల్లర్, భూమి పెడ్నేకర్ వంటి వారు ముఖ్య అతిథులుగా పాల్గొన్న ఈ అందాల పోటీలో థర్డ్ రన్నరప్‌గా నిలిచారు తెలంగాణకు చెందిన సుష్మా తోడేటి.

గతంలో మిసెస్ ఇండియా మై ఐడెంటిటీ పోటీల్లోనూ సత్తా చాటారు సుష్మా తోడేటి. పెళ్లి అయ్యాక మహిళల జీవితం వంటింటికే పరిమితం కాదని.. పెళ్లైనా, సంసార జీవితాన్ని సాగిస్తూ ఎన్నో శిఖరాలను అధిరోహించవచ్చని ఇప్పటికే ఎంతో మంది నిరూపిస్తూ వస్తున్నారు. అలాంటి ధీర వనితల్లో సుష్మా తోడేటి కూడా ఒకరు. మిసెస్ ఇండియా పోటీల్లో తెలంగాణ నుంచి పాల్గొని తెలంగాణ ఆచార, సంప్రదాయాలను చాటి చెప్పారు. గతంలో జరిగిన మిసెస్ ఇండియా మై ఐడెంటిటీ పోటీల్లో సుష్మా పలు కేటగిరీల్లో అవార్డులు సాధించారు. బెస్ట్ కల్చర్ డ్రెస్, మిసెస్ వెల్ స్పోకెన్, సోషల్ ఇన్‌స్టిట్యూట్ వంటి కేటగిరీల్లో టాప్‌లో నిలిచారు. ఇప్పుడు యూఎంబీ మిసెస్ ఇండియా పోటీలలో పాల్గొని మరోసారి తన సత్తా చాటారు సుష్మా తోడేటి.

ఈ సందర్భంగా ఆమె మాట్లాడుతూ.. కుటుంబమే నా బలం.. నా భర్త శ్రీనాథ్ వెన్నంటి ప్రోత్సహించడం వల్లే ఈ స్థాయిలో రాణించగలుగుతున్నాను. ప్రపంచ వేదికలపై తెలంగాణ సంస్కృతిని పరిచయం చేయడం అనేది గొప్ప అనుభూతిని కల్గిస్తుంది. తెలంగాణ చేనేతను ప్రపంచ వ్యాప్తంగా విస్తృతంగా ప్రచారం చేయాలనేది నా లక్ష్యంగా పెట్టుకున్నానని తెలిపింది.