Hyper Aadi: హైపర్‌ వార్నింగ్‌.. ఇదో కొత్త ట్రెండ్‌

ఈ మధ్యన ఏ ప్రీ రిలీజ్‌ ఈవెంట్‌ చూసిన వార్నింగ్‌లు ఎక్కువగా కనిపిస్తున్నాయి. ట్రోల్‌ చేస్తున్న వారిపైనో, ఇంకేదన్నా కారణాలతోనో వరుసగా వార్నింగ్‌ల పంచాయతీ నడుస్తోంది. ‘మెకానిక్‌ రాఖీ’ (Mechanic Rocky) ప్రీ రిలీజ్‌ ఫంక్షన్‌లో విశ్వక్‌సేన్‌ (Vishwak sen) రివ్యూ రైటర్లపై విరుచుకుపడ్డాడు. ‘వీపులు పగులుతాయ్‌’ అని హెచ్చరించాడు. ఏం పీకలేరు అంటూ సంజ్ఞలు చేశాడు. ఇప్పుడు హైపర్‌ ఆది కూడా అలాంటి  స్ట్రాంగ్  వార్నింగే ఇచ్చాడు. ట్రోలర్స్‌పై తన దైన శైలిలో చెలరేగిపోయాడు. ‘కేసీఆర్‌’ (KCR Movie) అనే సినిమా ప్రీ రిలీజ్‌ ఫంక్షన్‌కు హైపర్‌ ఆది (Hyper aadi) అతిథిగా వచ్చారు. అతనికి మైక్‌ అందితే స్పీచ్‌ కాస్త ఘాటుగానే ఉంటుంది. ఇప్పుడూ అదే జరిగింది. "చాలామంది జబర్దస్త్‌ షోని చిన్నచూపు చూస్తున్నారని, కామెడీనే కదా అని తేలిగ్గా తీసుకుంటారని అన్నారు. అదే షో నుంచి ఎంతో మంది దర్శకులు, హీరోలు వచ్చారని వాళ్ల వల్ల ఎన్నో కుటుంబాలు బతుకుతున్నాయన్నారు. తాము చేసే వీడియోలకు కోట్లలో వ్యూస్‌ వస్తాయి. ట్రోలర్స్‌ వీడియోలకు మాత్రం రెండే వ్యూస్‌ ఉంటాయని, ఒకటి తిట్టిన వాళ్లు చూస్తే , ఇంకోటి తిట్టించుకొన్న వాళ్లు చూస్తారని   ఇలా లేనిపోనివి మాట్లాడడం తప్ప, కళాకారులను ఏం పీకలేరని హైపర్‌ ఆది విరుచుపడ్డాడు.

బలగం వేణు గురించి కూడా హైపర్‌ ఆది ప్రత్యేకంగా మాట్లాడారు. ఓసారి షోలో.. తనేదో స్కిట్‌ చేస్తే , ఛాంబర్‌ ముందు వేణుపై చేయి చేసుకొన్నారని, ఇప్పుడు అదే వేణు 'బలగం' లాంటి గొప్ప సినిమా తీసి, అదే ఛాంబర్‌లో సన్మానాలు చేయించుకొన్నాడని, ఎవరినీ తక్కువ అంచనా వేయొద్దని అన్నాడు హైపర్‌ ఆది. ఇదే వేడుకకు మాజీ మంత్రి రోజా కూడా హాజరయ్యారు. రోజా, హైపర్‌ ఆది.. ఇద్దరూ రెండు వేర్వేరు పార్టీలు.. ఇద్దరికీ పడదని బయట గట్టిగా ప్రచారం జరుగుతుంటుంది. ‘‘రోజాని హైపర్‌ ఆది ఏమన్నాడో తెలుసా? అని యూ ట్యూబ్‌ వాళ్లు పెద్ద పెద్ద హెడ్డింగులు పెడతారు. కానీ నేనెప్పుడూ రోజాని ఏం అనలేదు. కానీ యూ ట్యూబ్‌ వాళ్లు కూడా బతకాలి కదా అని కౌంటర్‌ వేశాడు హైపర్‌ ఆది. ప్రస్తుతం ఆది వ్యాఖ్యలు వైరల్‌ అవుతున్నాయి.