NTR: కొత్త NTR వచ్చేశాడు.. జూ. ఎన్టీయార్ ఏమన్నాడంటే

నందమూరి వారసత్వాన్ని మరింత ముందుకు తీసుకువెళ్లేందుకు ఆ ఫ్యామిలీ నాల్గవ తరం నటులు రెడీ అవుతున్నారు. లెజెండరీ నటుడు ఎన్టీఆర్ ముని మనవడు, హరికృష్ణ మనవడు, దివంగత జానకిరామ్ తనయుడు యంగ్ చాప్ నందమూరి తారక రామారావు నటుడిగా గ్రాండ్ ఎంట్రీ ఇవ్వనున్నాడు. డైరెక్టర్ వైవిఎస్ చౌదరి రచన, దర్శకత్వం వహిస్తున్న ఈ మూవీ ఫస్ట్ లుక్‌ని నేడు (బుధవారం) విడుదల చేశారు. దీనిపై జూనియర్ ఎన్టీయార్ రియాక్టయ్యారు.

డైనమిక్ డైరెక్టర్ వైవిఎస్ చౌదరి రచన, దర్శకత్వం వహిస్తున్న ఈ ఎక్సయిటింగ్ ప్రాజెక్ట్‌ని ‘న్యూ టాలెంట్ రోర్స్ @’ (NTR@) బ్యానర్‌పై యలమంచిలి గీత నిర్మించనున్నారు. దీపావళి కానుకగా ఒక రోజు ముందే ఈ సినిమా పోస్టర్ ని రిలీజ్ చేశారు. తాజాగా ఎన్టీయార్ తొలి దర్శనం పేరుతో ఈ వీడియోని రిలీజ్ చేశారు. పవర్ ఫుల్ లుక్స్ తో, బేస్ వాయిస్ తో చూడగానే ఆకట్టుకునే లుక్ లో దర్శనం ఇచ్చాడు ఎన్టీఆర్. 19 ఏళ్లు అమెరికాలో యాక్టింగ్ లో మాస్టర్స్ చేసి, అన్ని కళలలో ప్రావిణ్యం సాధించి, కుటుంబ సభ్యుల సపోర్ట్ తో, ముత్తాత రామారావు బ్లేసింగ్స్ తో వైవీఎస్ చౌదరి దర్శకత్వంలో వెండితెరకు పరిచయం కాబోతున్నట్లు కొత్త ఎన్టీయార్ చెప్పుకొచ్చాడు.

ఇక దీనికి జూనియర్ ఎన్టీయార్ తన 'X' ఖాతా ద్వారా రెస్పాండ్ అయ్యారు. "రామ్.. నీ తొలి అడుగుకి అల్ ది బెస్ట్. సినీ ప్రపంచం నిన్ను ఆదరించడానికి లెక్కలేనన్ని క్షణాలను అందజేస్తుంది.. ముత్తాత ఎన్టీఆర్ గారు, తాతగారు హరికృష్ణ గారు, నాన్న జానకిరామ్ అన్నల ప్రేమ, ఆశీస్సులతో నువ్వు ఉన్నత శిఖరాలకు చేరుకుంటావనే అపార నమ్మకం నాకుంది" అంటూ తనదైన స్టైల్‌లో శుభాకాంక్షలు తెలిపాడు.