Kannappa: ప్రభాస్‌ ఫొటో లీక్‌.. పట్టుకుంటే బంపర్‌ ఆఫర్‌
ABN , Publish Date - Nov 09 , 2024 | 01:58 PM
‘‘కన్నప్ప’ చిత్రం కోసం గత ఎనిమిది సంవత్సరాలుగా మేము మా ప్రాణాలు పణంగా పెట్టి పని చేస్తున్నాం. ఇలాంటి సమయంలో ‘కన్నప్ప’ నుంచి ఒక్క ఫొటో అనధికారికంగా లీక్‌ అయినందుకు బాధపడుతున్నాం.
మంచు విష్ణు (Manchu Vishnu) ప్రధాన పాత్ర పోషిస్తున్న 'కన్నప్ప’ (Kannappa) చిత్రం నుంచి ప్రభాస్‌ లుక్‌ లీకైన (Prabhas Look leak) సంగతి తెలిసిందే. దీనిపైౖ చిత్రబృందం స్పందించింది. ఈ మేరకు ప్రేక్షకులకు ఓ విజ్ఞప్తి చేసింది. ఆ ఫొటోను లీక్‌ చేసిన వారిని కనిపెడితే రూ.5 లక్షల బహుమానం (Five lakh prize money) ఇస్తామని ప్రకటించారు. ‘‘కన్నప్ప’ చిత్రం కోసం గత ఎనిమిది సంవత్సరాలుగా మేము మా ప్రాణాలు పణంగా పెట్టి పని చేస్తున్నాం. రెండు సంవత్సరాల నుంచి ఈ ప్రాజెక్ట్‌ పనులు చురుగ్గా జరుగుతున్నాయి. దీనికోసం మా టీమ్‌ నిరంతరం కృషి చేస్తోంది. ఇలాంటి సమయంలో ‘కన్నప్ప’ నుంచి ఒక్క ఫొటో అనధికారికంగా లీక్‌ అయినందుకు బాధపడుతున్నాం. ఈ లీక్‌ మా కష్టాన్ని మాత్రమే కాదు.. ఈ ప్రాజెక్ట్‌ కోసం నిరంతరం కృషి చేస్తున్న రెండు వేల మంది వీఎఫ్‌ఎక్స్‌ కళాకారుల జీవితాలను కూడా ప్రభావితం చేస్తోంది. ఈ ఫొటో బయటకు ఎలా వెళ్లిందనే విషయంపై మేము పోలీస్‌ కేసు పెట్టాము. దయచేసి ఈ ఫొటోను ఎవరూ షేర్‌ చేయొద్దని మనవి. దీన్ని షేర్‌ చేసిన వారు చట్టపరమైన చర్య్చజీ ఎదుర్కోవాల్సి ఉంటుంది. అలాగే ఈ ఫొటోను లీక్‌ చేసిన వ్యక్తిని కనిపెట్టినవారికి రూ.5 లక్షలు బహుమానం అందిస్తాం. మీరందరూ మాకు సహకరిస్తారని ఆశిస్తున్నాం. అభిమానులు చేస్తున్న సపోర్ట్‌కు ధన్యవాదాలు’ అని ఓ నోట్‌ను విడుదల చేశారు.
మంచు విష్ణు టైటిల్‌ పాత్రలో ముఖేశ్‌కుమార్‌ సింగ్‌ (Mukesh kumar Singh) దర్శకత్వంలో తెరకెక్కుతున్న పాన్‌ ఇండియా చిత్రమిది. మోహన్‌బాబు నిర్మిస్తున్నారు. ప్రీతి ముకుందన్‌ కథానాయిక. ప్రభాస్‌, అక్షయ్‌ కుమార్‌, శరత్‌కుమార్‌, మోహన్‌లాల్‌ తదితరులు కీలక పాత్రలు పోషిస్తున్నారు. ఇందులో శివుని పాత్రలో అక్షయ్‌కుమార్‌, నంది పాత్రలో ప్రభాస్‌ కనిపించనున్నారని సమాచారం.