Pushpa 2: కన్నడలో పుష్ప బ్యాక్ ఫైర్!

ఐకాన్ స్టార్ అల్లు అర్జున్, క్రియేటివ్ డైరెక్టర్ సుకుమార్ కాంబినేషన్‌లో రూపుదిద్దుకుంటోన్న ‘పుష్ప 2 ది రూల్’ సినిమాపై ఆకాశమే అవధి అన్నట్లుగా అంచనాలున్నాయి. గురువారం హైదరాబాద్‌లో ఏర్పాటు చేసిన సమావేశంలో మైత్రీ నిర్మాతలతో పాటు దేశవ్యాప్తంగా 'పుష్ప-2' చిత్రాన్ని విడుదల చేస్తున్న డిస్ట్రిబ్యూటర్స్‌ పాల్గొన్నారు. ఈ సందర్భంగా ఈ చిత్రం కొత్త విడుదల తేదీని ప్రకటించారు. అల్లు అర్జున్‌ అభిమానులకు మరో శుభవార్త చెప్పారు. మొదట అనుకున్నట్లు డేట్ కన్నా ఒక రోజు ముందే ఈ చిత్రాన్ని విడుదల చేస్తున్నామని నిర్మాతలు ప్రకటించారు. దీనికి సంబంధించిన పోస్టర్‌ను విడుదల చేశారు. డిసెంబర్ 5న పుష్ప 2, ఆరు భాషల్లో ప్రేక్షకుల ముందుకు రానుంది. ఈ మీటింగ్ అనంతరం కర్ణాటకలో సెగలు రేకెత్తాయి. ఇంతకీ ఏమైందంటే..

ఈ ఈవెంట్‌లో కర్ణాటక డిస్ట్రిబ్యూటర్స్ మాట్లాడుతూ.. కెజిఎఫ్, కాంతార రికార్డులు బద్దలయ్యే స్థాయిలో రిలీజ్ ఇస్తామని, ఎక్కువ షోలు వేసుకుని మరిచిపోలేని మైలురాళ్ళు సాధిస్తామని చెప్పారు. దీంతో కర్ణాటక సినీ ప్రేమికులు మండిపడుతున్నారు. కన్నడ సినిమా ప్రైడ్‌గా నిలిచినా సినిమాలను ఉదాహరించి కామెంట్స్ చేయడం ఏంటని ఫైర్ అవుతున్నారు. ఇప్పటికే కర్ణాటకలో తెలుగు సినిమాల అధిపత్యంపై అక్కడి నిర్మాతలు కోపంతో ఉన్నారు. గతంలోనూ సీనియర్ యాక్టర్ రాజ్ కుమార్ నేతృత్వంలో ఇతర భాష చిత్రాలను కన్నడలో రిలీజ్ చేయొద్దు అని నిషేధం విధించారు. అయితే ఆయన మరణం తర్వాత నిషేధం ఎత్తివేశారు. సౌత్‌లో అల్లు అర్జున్ కి తెలుగు రాష్ట్రాల తర్వాత కేరళలో కంటే కర్ణాటకలోని ఎక్కువ కలెక్షన్స్ వసూల్ అవుతున్నాయి. పుష్ప రిలీజ్ ఈ నేపథ్యంలో ఇలాంటి పరిస్థితిలు ఎదురవడం కాస్త ఎదురు దెబ్బనే చెప్పుకోవాలి.

మరోవైపు ‘పుష్ప 2’లో జాతర ఎపిసోడ్‌ హైలెట్‌ కానుందని, ఇది మాస్టర్‌ పీస్‌లా డిజైన్‌ చేశామని, ఈ ఎపిసోడ్‌ కోసం చాలా కష్టపడ్డామని తెలిపారు రవి శంకర్‌(Ravi Shankar) . ’’జాతర ఎపిసోడ్‌ థియేటర్లో రోమాలు నిక్కబోడిచేలా ఉంటుంది. దాదాపు 35 రోజులు చిత్రీకరణ చేశాం. పది పదిహేను రోజులు రిహార్సల్స్‌ కూడా జరిపాం. ఈ ఎపిసోడ్‌ కోసం బన్నీ చాలా కష్టపడ్డారు. రోజంతా మొహానికి రంగులేసుకుని, చీర కట్టుకొని సెట్లో కూర్చునేవారు. ఆయన పడిన కష్టానికైనా ‘పుష్ప 2’ పెద్ద హిట్‌ కావాలి. ఈ సీన్‌ కోసం మైండ్‌ లెస్‌గా లెక్కలు లేకుండా ఏం వృధాగా ఖర్చు పెట్టలేదు’’ అని అన్నారు.