Srikanth Iyengar: క్షమాపణ చెబుతా.. వేచి ఉండండి

సినిమా రివ్యూ రైటర్స్‌పై (Review Writers) తాను చేసిన వ్యాఖ్యలపై నటుడు శ్రీకాంత్‌ అయ్యంగార్‌ (Srikanth Iyengar) స్పందించారు. త్వరలోనే క్షమాపణలు చెబుతానని ఎక్స్‌ వేదికగా వీడియో విడుదల చేశారు. ఇటీవల విడుదలై పాజిటివ్‌ టాక్‌తో ముందుకెళ/్తన్న ‘పొట్టేల్‌’ (pottel) సినిమా సక్సెస్‌ మీట్‌లో శ్రీకాంత్‌ అయ్యంగార్‌ సినిమా రివ్యూలు రాసే వారిపై పరుష పదజాలం ఉపయోగించారు. ఒక షార్ట్‌ ఫిల్మ్‌ తీయడం రానివాళ్లు రివ్యూలు ఇస్తున్నారని, సినిమా రివ్యూలు ఆపేయాలంటూ వేదికపై దుర్భాషలాడారు. దీనిపై సోషల్‌ సోషల్‌ మీడియాలో అతనిపై విమర్శలు వెల్లువెత్తాయి. దానిపై వివరణ ఇస్తూ శ్రీకాంత్‌ వీడియో విడుదల చేశారు. ‘‘పొట్టేల్‌’ సినిమా సక్సెస్‌ మీట్‌లో నేను కొన్ని మాటలు మాట్లాడాను. కొన్ని విషయాల్లో బాధ కలిగించాను.  అందరికీ కరెక్ట్‌ విషయాలపై త్వరలోనే క్షమాపణలు చెబుతాను. దయచేసి వేచి ఉండండి’’ అని పేర్కొన్నారు.

సినీ విమర్శకులపై నటుడు శ్రీకాంత్‌ అయ్యంగార్‌ అనుచిత వ్యాఖ్యలు చేశారంటూ ‘మా’ అధ్యక్షుడు మంచు విష్ణుకు ఫిల్మ్‌ క్రిటిక్స్‌ అసోసియేషన్‌ ఫిర్యాదు చేసిన సంగతి తెలిసిందే. అతనిపై తగిన చర్యలు తీసుకోవాలని ఫిర్యాదులో పేర్కొంది. ‘‘శనివారం ప్రసాద్‌ ల్యాబ్‌ వేదికగా జరిగిన ‘పొట్టేల్‌’ సినిమా సక్సెస్‌ మీట్‌లో శ్రీకాంత్‌ అయ్యంగార్‌ మీడియా గురించి దారుణంగా మాట్లాడారు. సినిమా రివ్యూ రాసే వారిపై పరుష పదజాలం వాడారు. ఆయన వ్యాఖ్యలను మీడియా తీవ్రంగా ఖండిస్తోంది. శ్రీకాంత్‌ అయ్యంగార్‌ మాటలు జర్నలిస్టుల మనోభావాలు దెబ్బ తీసేలా ఉన్నాయి. ఆయనపై తగిన చర్యలు  తీసుకోండి’’ అని ఫిల్మ్‌ క్రిటిక్స్‌ అసోసియేషన్‌ ఫిర్యాదులో పేర్కొంది.