Sharmila: ప్రభాస్‌తో నాకున్న రిలేషన్ ఏంటంటే.. షర్మిల సంచలన వ్యాఖ్యలు
ABN , Publish Date - Nov 22 , 2024 | 01:36 PM
ఫైనల్లీ.. కొన్ని ఏళ్ల నుండి ప్రచారంలో ఉన్న రూమర్స్‌పై వైఎస్ షర్మిల స్పందించారు. తనకి సినీ హీరో ప్రభాస్‌కి మధ్యలో ఏం సంబంధం ఉందొ తేల్చి చెప్పేశారు. ఇంతకీ ఆమె ఏమన్నారంటే..
కొన్నేళ్లుగా హీరో ప్రభాస్, వైఎస్ షర్మిల మధ్య ఎదో సంబంధం ఉందంటూ అనేక చర్చలు, వార్తలు వినిపిస్తూనే ఉన్నాయి. తాజాగా వైఎస్ షర్మిల ఈ వార్తలపై స్పందిస్తూ సంచలన వ్యాఖ్యలు చేశారు. ఈ వార్తలు సృష్టించిందో ఎవరో, ప్రచారం చేసింది ఎవరో తనకి తెలుసు అంటూ క్లారిటీ ఇచ్చింది. ఇంతకీ ఆమె ఏమన్నారంటే..
తాజాగా ఆమె మీడియాతో మాట్లాడుతూ.. ‘‘నా మీద బాలకృష్ణ ఇంటి నుంచి తప్పుడు ప్రచారం జరిగిందని జగన్ ఒక ఎంటర్‌టైన్‌మెంట్ వీడియో చూపించారు. మీకు ఇలా జరిగిందని తెలిసి ఉంటే మీరు ఐదేళ్లు సీఎంగా ఉన్నారు. అప్పుడు గాడిదలు కాశారా. విచారణ ఎందుకు చేయలేదు. ప్రభాస్‌కు నాకు సంబంధం ఉందని వైసీపీ సోషల్ మీడియా ప్రచారం చేయలేదా. మా పిల్లల మీద ఒట్టేసి చెబుతున్న ప్రభాస్ ఎవరో నాకు తెలియదు. ఆయన్ని నేను ఎప్పుడూ చూడలేదు. జగన్ ఈ ప్రచారం చేయించారు. నా వీడియో చూయించి జగన్ సానుభూతి పొందాలని చూశారు. జగన్ ఆయన స్వార్థం కోసం అమ్మపై కేసు పెడతారు.. నాన్న పేరు సీబీఐ చార్జి షీట్‌లో పెడతారు.. తనపై దుష్ప్రచారం చేయిస్తారు’’ అని వైఎస్ షర్మిల తీవ్ర ఆగ్రహం వ్యక్తం చేశారు.